ဗျူဟာမဲ့ တော်လှန်ရေး

ဗျူဟာမဲ့ တော်လှန်ရေး
နိဒါန်း
အေနိခေတ် ကမ္ဘာပေါ်မှာ နိုင်ငံပေါင်း ၁၉၆ နိုင်ငံ (ထိုင်ဝမ်အပါအဝင်) ရှိပါရေ။ နိုင်ငံတိုင်းရေ ကိုယ့်သမိုင်းကြောင်းနန့်ကိုယ် ဖြစ်ပေါ်လာကတ်ပြီးကေ ဖွံ့ဖြိုးပြီးနိုင်ငံ၊ ဖွံ့ဖြိုးဆဲနိုင်ငံ နှင့် လုံးဝမဖွဲ့ဖြိုးသေးသောနိုင်ငံ ဆိုပြီးကေ ပိုင်းခြားသတ်မှတ်ထားကတ်ပါရေ။ မြန်မာနိုင်ငံရေ ယင်းအထဲက အလယ်အလတ်အဆင့်ဖြစ်တေ ဖွံ့ဖြိုးဆဲနိုင်ငံများစာရင်းမှာပါဝင်နီကေလေ့ လက်ရှိမြန်မာနိုင်ငံ၏ နိုင်ငံရေးစနစ်၊ စီးပွားရေးစနစ်၊ ပညာရေးစနစ်၊ ကျန်းမာရေးစနစ်တိရေ ကကောင်းကြီးနိမ့်ကျနီစွာကိုမြင်တွိ့ကတ်ရပါရေ။ ယင်းအထဲမှာမှ မြန်မာနိုင်ငံ၏ ပြည်နယ် ၇ခုထဲက အကျွန်ရို့ရခိုင်ပြည်ရေ ကျန်ပြည်နယ်တိထက် အများကြီးနိမ့်ကျဆင်းရဲနီပြီးကေ ဖွံ့ဖြိုးမှုကလေ့ အနုတ်လက္ခဏာပြရလောက်အောင် အခြေအနေရှိနီပါရေ။ လက်ရှိမြန်မာနိုင်ငံအစိုးရကလေ့ ရခိုင်ဒေသကို နိုင်ငံရေးအရရော၊ လူမျိုးရေးအရပါ ဖိနှိပ်ချုပ်ချယ်နီစွာကိုတော့ခါ အားလုံးမျက်မြင်ကိုယ်တွိ့ပါဗျာလ်။ ယင်းပိုင်မြန်မာအစိုးရ၏ ဖိနှိပ်ခံနီရစွာကြားထဲက သမိုင်းလိမ် ရိုဟင်ဂျာ ဘင်္ဂလီပြသနာကလေ့ တဖုံဖြစ်နီပါရေ။ အေပိုင်ပြသနာတိ ကြားထဲကနိပနာ ရခိုင်သားရို့ရေ ရခိုင်ပြည်ကြီးကို ဇာပိုင်ဆွဲထုတ်လားကတ်ဖို့လဲ ဆိုစွာက မီးစရာ မီးခွန်းဖြစ်လာနီပါရေ။ 

လက်ရှိ ရခိုင်ပြည်နိုင်ငံရေး အခြေအနေ
ရခိုင်တစ်မျိုးသားလုံး၏ မျှော်လင့်ချက်အိပ်မက်ရေ ရခိုင်ပြည်အချုပ်အချာအာဏာကို ပြန်ပြီးကေ ရယူပနာ ရခိုင်နိုင်ငံတော်ကို တည်ဆောက်ကတ်ခြင်းဖြစ်ပါရေ။ ယေရာလေ့ ရခိုင်ပြည်လက်ရှိအခြေအနေနန့် တိုင်းတာကြည့်လိုက်ဖို့ဆိုလို့ရှိခကေ ရည်ရွယ်ချက်နန့် လက်ရှိအခြေအနေက ကောင်းကင်နန့် မြီပြင်ပိုင် အလှမ်းဝီးနီပါသိရေ။ လက်ရှိရခိုင်ပြည်၏ နိုင်ငံရေးအခြေအနေကို ပြည်တွင်းနိုင်ငံရေးနန့် ပြည်ပနိုင်ငံရေးဆိုပြီးကေ နှစ်မျိုးခွဲခြားနိုင်ပါရေ။ ပြည်တွင်းနိုင်ငံရေးအတွက်က ပါတီနိုင်ငံရေးလမ်းစိုင်ကိုကျင့်သုံးနီပြီးကေ ပြည်ပနိုင်ငံရေးအတွက်ကတော့ခါ ပါတီနိုင်ငံရေးအပါအဝင်၊ လက်နက်ကိုင်တော်လှန်ရေးတပ်တိပါ ရှိပါရေ။ ပြည်တွင်းနိုင်ငံရေးပါတီအနီနန့် လက်ရှိမှာ ရခိုင်တိုင်းရင်းသားများတိုးတက်ရေးပါတီနန့် ကြံ့ခိုင်ရေးပါတီရို့ကနီရာယူထားကတ်ပြီးကေ ပြည်ပဖက်မှာတော့ခါ ALP (ALA), AA (ကချင်), AA(ထိုင်းနယ်စပ်), ANC ရို့က ဦးဆောင်နီကတ်ပါရေ။ လာဖို့ ၂၀၁၅ အကုန် ၂၀၁၆ ရွီးကောက်ပွဲအတွက် ပြည်တွင်းရခိုင်ပြည်ကိုယ်စားပြုပါတီတစ်ခုဖြစ်တေ ရခိုင်အမျိုးသားပါတီကလည်း အဆင့်ဆင့်ပြင်ဆင် အားယူနီဗျာလ်ဖြစ်ပါရေ။ ယေရာလည်း ပြည်တွင်းပါတီတစ်ခုအနီနန့်တော့ခါ ၂၀၀၈ ဖွဲ့စည်းပုံအောက်မှာပဲ ရှင်သန်နိုင်ဖို့ဖြစ်ပါရေ။ ပြည်ပမှာဟိနီရေ အဖွဲ့အစည်းတိအနီနန့်ကလည်း အခြားတိုင်းရင်းသားတိနန့်တတူ ဖယ်ဒရယ် လမ်းစိုင်ကိုလျှောက်လှမ်းနီကတ်စွာကို တွိ့ရပါရေ။
ရခိုင်အမျိုးသားပါတီ (ANP)
ရခိုင်အမျိုးသားပါတီရေ လက်ရှိရခိုင်ပြည်အာဏာရပါတီ တစ်ခုဖြစ်တေ ရခိုင်တိုင်းရင်းသားများ တိုးတက်ရေးပါတီ (RNDP) နန့် ၁၉၉၀ ရွီးကောက်ပွဲအနိုင်ရပါတီ ရခိုင်ဒီမိုကရေစီအဖွဲ့ချုပ်ပါတီ (ALD) ရို့ကို ပေါင်းစပ်ထားရေ ပါတီတစ်ခုဖြစ်ပါရေ။ ရခိုင်အမျိုးသားပါတီဖြစ်ပေါ်လာရေ ရည်ရွယ်ချက်ကဆိုကေ လာဖို့ ၂၀၁၅/၁၆ ရွီးကောက်ပွဲမှာ ရခိုင်တစ်မျိုးသားလုံးစီးစီးလုံးလုံးနန့် အောင်ပွဲဆင်နိုင်ဖို့အတွက်ဖြစ်ပါရေ။ သို့သော်လည်း ယင်းပါတီအနီနန့် ဗမာအစိုးရ၏ ၂၀၀၈ ဖွဲ့စည်းပုံအောက်မှာ လက်ရှိနိုင်ငံရေးအခင်းအကျင်းတိကို ထိမ်းထားဖို့စွာကလွဲလို့ တစ်ခုလေ့ ကြီးကြီးမားမားပြောင်းလဲလာအောင် ပြုလုပ်ပီးနိုင်ဖို့မထင်ပါ။ စစ်မှန်ရေဖယ်ဒရယ်ပြည်ထောင်စုတစ်ခု မဖြစ်လာသရွီ့တော့ခါ အာဏာကို ဗဟိုကချုပ်ကိုင်ပနာ မျှော်လင့်ထားကတ်သလောက်တာလားနိုင်ဖို့မထင်ပါ။ ယင်းပိုင်အခြေအနေနန့်ပင် ရခိုင်အမျိုးသားပါတီအနီနန့် ရွီးကောက်ပွဲအနိုင်ရကေတောင်မှ လုပ်ပိုင်ခွင့်အာဏာမရှိရေအတွက် ဘင်္ဂလီပြသနာကို ဖြေရှင်းနိုင်ဖို့ဆိုစွာက ကကောင်းမလွယ်ကူလှပါ။ ယင်းကြောင့် ရခိုင်အမျိုးသားပါတီအနီနန့် အေဖွဲ့စည်းပုံအောက်မှာ မြန်မာပြည်နိုင်ငံရေး ဂယက်ရိုက်ခတ်မှုကို ကျားကန်ပီးယင်းနန့် ရခိုင်ပြည်ကြီးအတွက် မဆိုစလောက် ဖွံ့ဖြိုးမှုချေတိကိုရာ ပြုလုပ်နိုင်ပါလိမ့်မေ။ RNDP ကလေ့ လက်တွိ့ဥပမာ ပြထားဗျာလ်ဖြစ်ပါရေ။
ရခိုင်ပြည်လွတ်မြောက်ရေးပါတီ (ALP)
ရခိုင်ပြည်လွတ်မြောက်ရေးပါတီရေ လက်ရှိ ဘင်္ဂလားဒေ့ရ်ှနန့် ထိုင်း၊ မလေးရှာရို့မှာအခြေစိုက်ပနာ ပါတီဥက္ကဌမှာ ဦးခိုင်ရဲခိုင်ဖြစ်ပါရေ။ ALP ပါတီရေ လက်ရှိမှာ ရခိုင်ပြည်၏ အရှည်ကြာဆုံး အဖွဲ့အစည်းတစ်ခုဖြစ်ပြီးကေ ပါတီလမ်းစိုင်ရော လက်နက်ကိုင်လမ်းစိုင်ကိုပါ နှစ်ခုစလုံးကို ပါတီ၏ဖြတ်သန်းလာမှုအတွိ့အကြုံအရ နိုင်ငံရေးပရိယာယ်ကျွမ်းကျင်ပိုင်နိုင်စွာနန့် ကစပ်လာနီပါရေ။ ALP ၏ အဓိကမူမှာ ၇ခိုင်ပြည်လွတ်မြောက်ရေးအတွက်ဖြစ်ကေလေ့ လက်ရှိမှာ ဗမာအစိုးရနန့် အပစ်အခတ် ရပ်စည်းထားပြီးကေ ရခိုင်ပြည်တွင်းမှာရုံးစိုက်ပနာ ဗမာအစိုးရ၏ ငြိမ်းချမ်းရေးလမ်းကြောင်းမှာ ပါဝင်နီပါရေ။ သို့သော်လည်း လက်ရှိမှာ ပါတီမူဝါဒ ပြောင်းလဲခြင်းနန့် ပါတီတွင်းပြသနာတိကြောင့် ပါတီ၏ စွမ်းဆောင်ရည်ကျဆင်းပနာ ရခိုင်ပြည်သူလူထု ယုံကြည်အားကိုးမှုလည်း လျော့ကျလာနီပါရေ။ ALP အနီနန့် လက်ရှိမှာ အခြားတိုင်းရင်းသားလက်နက်ကိုင်အဖွဲ့တိနန့်တတူ ဖယ်ဒရယ်လမ်းစိုင်ကိုလျှောက်လှမ်းနီကေလေ့ တစ်ကယ်လို့များဖယ်ဒရယ်လမ်းစိုင်ုဖြစ်မလာခကေ ဇာပုံစံနန့်ဆက်လားဖို့၊ ရခိုင်ပြည်ကို ဇာပိုင်ကာကွယ်ဖို့ဆိုရေ မူဝါဒတိ ချမှတ်ထားပုံမပေါ်သိပါ။ ဗမာအစိုးရ၏ ဖယ်ဒရယ် လမ်းကြောင်းနောက်ကို၇ာ အားစိုက်လုပ်နီပါရေ။ ဇာပိုင်ပဲဆိုဆို ALP ရေ နိုင်ငံရေးအတွိ့အကြုံ ရင့်ကျက်ရေအတွက်နန့် မြန်မာပြည်နိုင်ငံရေးနယ်ပယ်မှာ ကောင်းကောင်းကြီး ကစပ်နိုင်ဖို့လို့ မျှော်လင့်ပါရေ။
ရခိုင်ပြည်တပ်မတော် (AA)
ရခိုင်ပြည်တပ်မတော် ရေ လက်ရှိမှာ ကရင်/ထိုင်း နယ်စပ်တစ်နေရယမှာ အခြေစိုက်ပြီးကေ လက်ရှိခေါင်းဆောင်မှာ ဗိုလ်မှူးကြီး မင်းဇံဝေဖြစ်ပြီး ANC ၏ လက်အောက်ခံအဖွဲ့တစ်ခုလည်းဖြစ်ပါရေ။ ရခိုင်ပြည်တပ်မတော်လည်း ANC နန့်တတူ အစိုးရနန့် အပစ်အခတ်ရပ်စဲပြီးကေ ငြိမ်းချမ်းရေးလုပ်ငန်းစိုင်မှာ ပါဝင်ဆောင်ရွက်နီပါရေ။ ရခိုင်ပြည်တပ်မတော်၏ ရည်ရွယ်ချက်မှာကား စစ်မှန်သော ဖယ်ဒရယ် ပြည်ထောင်စုပေါ်ပေါက်လာရေး၊ ကိုယ်ပိုင်ပြဌာန်းခွင့်ရရှိရေးရို့ဖြစ်ပါရေ။ သို့သော်လည်း ရခိုင်ပြည်နှင်း အခြေစိုက်စခန်းမှာ အလှမ်းကွာဝီးနီရေအတွက်နန့် ဖယ်ဒရယ် လမ်းကြောင်းကလွဲပြီးကေ ရခိုင်ပြည်ကို ကယ်တင်ဖို့အတွက် နောက်ထပ်လမ်းကြောင်းကိုရွီးချယ်ဖို့ အဆင်မပြေနိုင်ပါ။ ယင်းကြောင့် ရခိုင်ြပည်တပ်မတော်သည်လည်း ရခိုင်ပြည်ကိုကယ်တင်ဖို့အတွက်နန့် ဖယ်ဒရယ်လမ်းကြောင်းကလွဲလို့ နောက်ထပ် အဖြေ၊ မူဝါဒ ရှိနိုင်ဖို့မထင်ပါ။
ရက္ခိုင်တပ်မတော် (AA)
ရက္ခိုင်တပ်မတော်ရေ လက်ရှိမှာ ကချင်ပြည်နယ် KIO ထိမ်းချုပ်နယ်မြေထဲမှာအခြေစိုက်ပြီးကေ လက်ရှိခေါင်းဆောင်မှာ ဗိုလ်မှူးကြီး ထွန်းမြတ်နိုင်ဖြစ်ပါရေ။ ရက္ခိုင်တပ်မတော်၏ ရည်ရွယ်ချက်ကဆိုကေ ရခိုင်ပြည်ကိုကာကွယ်ဖို့နန့် အချုပ်အချာအာဏာပြန်လည်ရရှိရေးတို့ဖြစ်ပါရေ။ ရက္ခိုင်တပ်မတော်ရေ လက်ရှိမှာ ဗမာအစိုးရ၏ ငြိမ်းချမ်းရေးလုပ်ငန်းစိုင်မှာ ပါဝင်ခြင်းမရှိပါ။ လက်ရှိ ရခိုင့်လက်နက်ကိုင်အဖွဲ့အစည်းတိထဲမှာ အင်အားအကောင်းဆုံးနန့် လူထုထောက်ခံမှု အများဆုံးရထားရေ အဖွဲ့ဖြစ်ပါရေ။ သို့သော်လည်း ရက္ခိုင်တပ်မတော်၏ အဓိကပြသနာမှာ အဖရခိုင်ပြည်ကိုကာကွယ်ဖို့အတွက် ရခိုင်ပြည်ဖက်ကို တပ်ရွီ့ဆိုင်းလာဖို့စွာရေ အခက်အခဲတစ်ခုဖြစ်နီပါရေ။ လက်ရှိမှာတော့ခါ ကချင်နယ်မြေထဲမှာ အင်အားစုဆောင်းယင်းနန့် KIA နန့်တတူ ဗမာအစိုးရစစ်တပ်တိကို တိုက်ယင်းနန့် ခရီးဆက်နီပါရေ။ ဇာပိုင်ပင်ဆိုဆို ရက္ခိုင်တပ်မတော်အနီနန့် တိုက်ပွဲအတွိ့အကြုံတိကို ရနီပါရေ
ဇာပိုင်ပင်ဆိုဆို အထက်ပါအဖွဲ့အစည်းတိရေ ရခိုင်ပြည်အကျိုးအတွက် သူ့မူဝါဒနန့်သူ ခရီးဆက်နီကတ်စွာဖြစ်ပါရေ။ လက်ရှိအချိန်မှာရခိုင်ပြည်အတွက် ထိထိရောက်ရောက်နန့်အကျိုးမပြုနိုင်သိကေလေ့ နောင်တစ်ချိန်မှာ အကျိုးပြုလာနိုင်ဖို့မျှော်လင့်ပါရေ။ ယေကေ ... အေဂုခေတ်မှာ နိုင်ငံတစ်နိုင်ငံကိုတည်ဆောက်ဖို့ဆိုစွာ လွယ်ကူရေကဏ္ဍတော့မဟုတ်ပါ။ လက်ရှိရခိုင်ပြည်ရေ အချုပ်အချာ အာဏာ ကျဆုံးခရစွာ နှစ်ပေါင်း ၂၃၀ ပြည့်ီု့ဗျာလ်ဖြစ်ပါရေ။ ခေတ်အဆက်ဆက် အုပ်ချုပ်တေလူတိ၏ ဖိနှိပ်ချုပ်ချယ်မှုကြောင့် ရခိုင်ပြည်ကြီးလည်းဆင်းရဲတွင်းနက်ပြီးကေ အသိပညာရှင် အတတ်ပညာရှင်တိလေ့ မရှိသလောက်ကို ရှားလားခပါဗျာလ်။ နိုင်ငံတစ်နိုင်ငံတည်ဆောက်ဖို့အတွက်နန့် အေခေတ်မှာ စီးပွားရေး အင်အား၊ ပညာရေးအင်အား၊ စစ်ရေးအင်အား၊ ယင်းလူမျိုးတိ၏ အသိပညာကြွယ်ဝမှုအခြေအနေ၊ လူ့အရင်းအမြစ် စရေ အဖက်ဖက်ကလိုအပ်ပါရေ။ အဂုရခုိင်ပြည်မှာ ယင်းချင့်တိအားလုံးနန့်ဆန့်ကျင်ဖက်ပါ။ ပြည်တွင်း ပြည်ပ အဖွဲအစည်းတိအနီနန့်ကလည်း အချင်းချင်းတိုက်ခိုက်ပနာ စည်းလုံးမှုမရနိုင်ပဲ နုိင်ငံတစ်ခုကို ဇာဗျူဟာနန့်တည်ဆောက်ကတ်ဖို့လည်း။ လက်ရှိမှာ နှစ်တိအကြားကြီး ကြာပြီးမှ လွတ်လပ်ရေးရခရေနိုင်ငံတိ ရှိခကေလေ့ ထိုနိုင်ငံတိသည် အထိုက်အလျောက်တိုးတက်ပြီးမှ လွတ်လပ်ခကတ်စွာပင်ဖြစ်ပါရေ ။ ရခိုင်ပြည်၏ အေပိုင်နိကျနီရေ အနီအထားနန့် မသင့်မြတ်တေရခိုင့်အဖွဲ့အစည်းတိကြားမှာ ရခိုင်ပြည်အနာဂတ်ခရီးကိုဇာပိုင်ဆက်ကတ်ဖို့လဲ။ လက်ရှိဖြစ်နီရေပြသနာ၊ နောက်ဖြစ်လာဖို့ပြသနာ၊ မျိုးဆက်သစ်တိ၏ အနာဂတ်အတွက် ဇာအဖွဲ့အစည်းက ဇာပိုင် ဗျူဟာချပနာ ရခိုင်ပြည်အတွက်လုပ်နီကတ်စွာပါလေ။
ရခိုင်ပြည်၏ အဂနာကတ်ရေ တဖြည်းဖြည်း နန့် ပျောက်လာနီပါဗျာလ်။ ရွှေရောင်အိပ်မက်တိလေ့ မှုန်ဝါးလားဗျာလ်။ ရခိုင်တော်လှန်ရေးမျိုးဆက်မပျောက်စီဖို့ အကျွန်ရို့ဇာလုပ်ကတ်သင့်လေ။ ။
 http://mynameisrakhaing.blogspot.com/